සොඳුරු වෙරළ (සුනාමි ආවර්ජනයකි)........

සයුර නුඹ කිසි දිනෙක 
චේතනාවෙන් තොරව 
කෙරුනු වරදක් නමින් 
ගැරහුමට ලක් උනිද....

     ගැඹුරු පතුලේ අන්ධ
     දෙදරුමට ගිනි බින්ද 
     සයුරු රළ අනු නන්ද 
     උදම් උන වරදින්ද...

නුඹ පතුල ගිනි දක්වා 
නැගෙන ගිනි කඳු ලවා 
කලෙද වෙසෙසින් මුවා 
එදින නම් බැරි උනා....

     රික්ටාවෙ මාපකය 
     නවය පැන ගිය එකට 
     සඟව ගනු බැරි  දුකට 
     සෙලවුනා නුඹෙ ඇකය...


සයුර වෙරලක රැදුන 
නුඹ දසුන මන බැඳුණු 
මොහොතකට බොඳ කෙරුනු 
සුනාමිය මයි දරුණු.... 

කේන්දරේ 

සෞරග්‍රහ මන්ඩලයේ
අයාලේ යන ග්‍රහ තරුවනි,
කොයි යන්නේ කැරකෙන්නේ...

කොයිබද, 
කොතැනටද නොදැන 
අප ඉපදෙන විට පිහිටියේ....
ස්ථානය කොටුකරගෙන,
ජන්ම පත්‍රවල වැජබී
ජීවිත තීරණ කලෙහිද.....?
දුබල එවුන් ළඟ උච්චයි,
ප්‍රභල එවුන් ළඟ නීචයි...
ග්‍රහයා කොතැන පිහිටියේද
නොවේය වැදගත් වන්නේ 
අප හරියට පිහිටියාද
එතනයි තීරණ වන්නේ.... 

අනතුරක.....

කැකුලු මල අනතුරකි,
එපා හකුලා ඉන්න,
සුවඳ පිටතට නොදි,
සැගවිලා මෝරන්න...
මලින් මල තලා එන
බඔර මී මැසි රැහැන්,
කිලිටි පා තුඩු ගොන්න,
සිනිදු පෙති පොඩි කරයි..
ළපටි රොන් පුද දෙන්න,
යදින සිත සතපන්න,
ගුම් නදට නොරැවටී,
කෙමෙන් විකසිත වන්න...
සමනලුද රැහැන්මයි,
අපහසුයි හදුනන්න,
බුද්ධියේ සුළං වැද
මුකුලිතව හිනැහෙන්න.....