....රජ්ජුරුබණ්ඩාර දෙවියන්ගේ ගැටබරු අඩවිය....
ඉස්තෝප්පුවේ බුලත් විට හපමින් සිටි මහළු මිනිසා අසල තිබූ කොලොම්බුව මත ඈදි ගනිමින් අහස දෙස ඇස් යොමුකොට අදවත් වැහිකෝඩේ තුරන් වී යා දැයි කල්පනාවක සිටී...
සීයා :- “ඊයේ දොහෙත් ගැටබරු පෙරහැරට වැස්සෙන් බොහෝ කරදර වුනා නොවැ.“
මිණිබිරිය :- “සීයේ...මං සීයාගෙන් අහන්නමයි උන්නෙ“
සීයා:- “මොකැයි පුතේ..“
මිණිබිරිය :- “ගැටබරු පෙරහැරට අරතරම් මහ සෙනඟක් එන්නෙ ඇයි සීයේ..“
බුලත් කෙල පහර පඩික්කමට ගැසූ මහළු මිනිසා උගුරකට පාදා හරිබරි ගැසෙමින් සැරසුනේ දිගු කතාවකට මුලපිරීමට යැයි පෙනුණි.
සීයා :- “ඒක බොහොම දිග කතාවක් දුවේ...“
“අතීතේ උන්නු ඇත්තෝ කියන හැටියට ඔය ගැටබරු රජ මාළිගේ ඉදිකොරැයි කියන්නෙ වලගම්බා රජ්ජුරුවො..දකුණු පලාතේ මොරවක්කෝරලේ (වර්තමාන දෙනියායේ ප්රදේශය ) සැඟව හිටිය කාලේ..ඒ උත්තමයා රජකම අහිමිවෙලා පලාගොස් හිටපු තැන්වල ගල් විහාරහෙම ඉදිකරලා තියනවා දුවේ..“
මිණිබිරිය :- “ඉතිං එතකොට සීයේ ගැටබරුවත් එහෙම ඉදිකරපු ගල් විහාරයක්ද?“
සීයා:- “නැතුව නැතුව කෙල්ලේ..,ඒකනේ මං උඹට මේ කියන්න යන්නේ..“
“ඔය ඉදිකොරයි කියන ගල් විහාරේ ටික කලක් යද්දි කැලෑවට සැඟවිලා ගොහින් තියනවා ..සියවස් දෙකක් ගොහින් තමයි ඔය ගල් විහාරේ ආයෙම හොයාන තියෙන්නෙ“
“ඔය හොයගත්තයි කියන කතාව ජනවහරේ එන්නෙ මෙහෙමයි කෙල්ලේ..“
නැවතත් පඩික්කම අතින්ගෙන එයට කෙල ගැසූ මහළු මිනිසා නැවතුමක් ගෙන, කතාව කීමට සැරසෙයි..
“ඔය ගල් විහාරෙ හොයාගන්න හේතු වුනයි කියන්නේ කෙල්ලේ..ගෝනෙක්ලු..ඒ කාලෙ මොරවක්කෝරලේ හිටියයි කියන එලියස් හාමි දවසක්දා කැලේට යද්දී..ගෝනෙක් උන්ද පස්සෙ ඇවිත් තියනවා..එලියස් හාමි හැරිලා බලද්දි ඌ ආයේ ඉවතට දුවලා තියනවා..ඒ වෙලාවෙ එලියස් හාමි ඒ ගෝනව ලුහුබැන්දා කියලයි කියන්නෙ දුවේ..ඒ ගෝනා දුවගෙන ගිහින් ගල් ගුහාවකට රිංගලා තියනවා..එලියස් හාමිත් ඒ පස්සෙන් ගිහින් බලද්දී ගල් ගුහාව ඇතුලේ දහ අට රියන් දිග සැතපෙන බුදු පිළිරුවක් තිබිලා තියනව..උන්දා ඒ වෙලේ සෑහෙන්න පුදුමයට පත්වෙලා තියනව කියලයි කියන්නේ..අන්න එතනදි තමයි දුවේ කැලේට සැගවෙලා ගොහින් තිබ්බයි කියන ගල්විහාරේ ආයෙම හොයාගන්නේ..
පස්සෙ කාලෙකදි ඒ ගල් විහාරෙ එළිපෙහෙලි කොරලා උපාසක ඇත්තොයි,ගම් වැසියොයි එකතුවෙලා සංඝාවාසයක් ඉදිකොරලා “වීරසිංහ කන්දෙ සුමංගල හිමි“ නමට පූජා කොරලා තියනවා..ටික කාලයක් ගොහින් ගමේ සංඝයා වහන්සේලයි, දායක ඇත්තොයි මේ විහාරෙ ටිකෙන් ටික දියුණු කොරලා අද තියන තත්වෙට ගන්න කටයුතු කොරලා තියනවා..“
මිණිබිරිය :- “එතකොට ඇයි සීයේ ඒ ගල් විහාරෙට ගැටබරුව කියන නම පටබැදිලා තියෙන්නේ“
සීයා :- “මෙහෙමයි කෙල්ලේ...ඉස්සර කාලේ ඇත්තෝ..ඔය ගල්විහාරෙ ළඟ පඬුරු ගැටගහල තියනවා..ආන්න ඒ හින්දයි ගැටබරුව කියන නම බැදිලා තියෙන්නේ දුවේ.“.
ඕන්න ඔයවිදියට තමයි අද වෙනකොටත් දකුණුලක පමනක් නොව මුළුමහත් ලංකාවෙම ප්රසිද්ධියක් ලබා ඇති ගැටබරුව රජ මහා විහාරය බිහි වුනේ..රුහුණු රට බටහිර අධිපති වූ රජ්ජුරුබණ්ඩාර දෙවියන්ගේ වාසභූමිය වන ගැටබරුවෙහි දේව අනුහස් බොහෝය.එම නිසාවෙන් ලංකාවේ විවිධ පළාත්වලින් ජනයා තම නොයෙක් අභිප්රායන් ඉටුකර ගැනීමටත් අපල උපද්රව දුරුකර ගැනීමටත් දේව ආශීර්වාද ලබා ගැනීමටත් ඓතිහාසික වටිනාකම් බොහෝ ඇති ගැටබරුව රජ මහා විහාරයට පැමිණෙන්නේ
සීයා :- “ඔන්න ඔය කාරණා හින්දයි කෙල්ලේ...අරතරම් මහා සෙනඟක් වසරේ පුරාවට පැවැත්වෙන ගැටබරු මහා පෙරහැර මංගල්යයෙ දැක බලා ගන්න නොයෙක් පැතිවලින් එන්නේ...“
එදා, අද පමණක් නොව සදා ජීවමාන, රජ්ජුරුබණ්ඩාර දෙවියන් වැඩ වාසය කරන මොරවක්කෝරලේ ගැටබරුකන්ද රජ මහා විහාරය ගම්වැසියන්ට පමණක් නොව මුළුමහත් රට වැසියන්ටම මහා ආශිර්වාදයක්...
නිමි...
නිමාශා දේවින්දි හීනටිගල
HS /2015/0324
(සම්ප්රදායික සන්නිවේදනය)
