සත්‍ය විය යුත්තේ...... 

 

අප රටේ ජීවත්වන සියල්ලෙක්ම පාහේ කුමන හෝ ආගමක් අදහනු ලබයි.ආගමක් අදහනවාට වඩා එය තමාම අවබෝධ කරගෙන එය සත්‍ය නම්, වැලඳ ගැනීම කල යුතුයැයි කීවේ තිලෝගුරු බුදුරජාණන්වහන්සේ  වහන්සේමය.එමෙන්ම උපතින්ම දෙමවුපියන්ගේ ආගම උරුම  වීම සාමාන්‍ය කරුණකි.එහෙත් තර්ක කිරීමේ අවස්ථාවක් වක් තිබිණි.ගිහි ගෙයට නියම වූ ශික්‍ෂාපද පහක් නියම විය.එය පිලිනොපදින්නේනම් ඉන් වන ආදීනව මනාව පැහැදිලි කරදී ඇත.ගිහිගෙය ඔබ්බවා අටසිල්,දසසිල් රකින්නේනම් ඒවාටද කැප අකැප උදාහරණ සහිතව පෙන්වා දී ඇත.පරලොවක් ඇතත් නැතත් මේවායේ සත්‍යතා තහවුරු වන අවස්තා බොහෝය.

 “නැතත් එපරලොව ඉන් වන අවැඩ නැත
   ඇතොත් නැතැයි පවු කල හට වෙයි විපත“
මෙය ප්‍රායෝගික සත්‍යකි.
    එහෙත් වෙනත් ආගම් හා ඇදහිලි වල මේවාට විවිධ සමාවල් ලබා දී ඇත.“දෙවියන් වහන්සේ සියල්ල තීරණය කරයි“මෙය මොනතරම් සත්‍ය වාදී වන්නේද? එය එසේනම් අපට කරන්නට දෙයක් ඉතිරි නොවේ.අපේ ආහාරවේල දෙවියන් වහන්සේ තීරණය කරයිද යන්න දීර්ඝව ලිවිය යුතු නොවේ.එය හුදෙක් අපේ උත්සාහය මතම සිදුවේ.ඉස්ලාම් ආගම අදහන්නා සතුන් මරා මස් කර විකුණා අල්ලා දෙවියන්ගෙන් සමාව ඉල්ලා සිටී.එසේ සමාවක් අල්ලා දෙවියන්ට ලබා දීමට හැකිනම් පලමුව මස් කර විකිණිය යුත්තේ අල්ලා ය.තවත් බොහෝ ඇදහිලි ආගම් ඇත. බුද්ධාගමෙහිද “උපන්දා සිට කරපු පවු මැත වරක් වැන්දොත් කැළනියේ“යනුවෙන් දක්වයි.නමුත් කිසිකලෙකත් බුදුදහමෙහි එවන්නක් නොදැක්වේ.ඒවා මගදී  එකතු කරගත් බුදුදහමට ගැරහෙන තැන්ය.එසේ වූවානම් කැළනි විහාරයට කිට්ටු වීමට නොහැකිවන සේ වයෝවෘද ජනතාව සැමදිනකම කැළණි විහාර භූමියට රැස් වනු ඇත.

    කෙසේ වෙතත් බොහොමයක් ආගම් වල අදැහෙන්නේ හොඳ දේය. ශාස්තෘ වහන්සේලා බොහෝ සත්‍ය දේ දේශනා කොට ඇත.ඒවා පොදුවේ සැලකිල්ලට ගෙන තර්කාණුකූල වූ පොදු ආගමක් ඇදහීම සියල්ලගේම හිත සුව පිණිස වන්නේයයි මාගේ අදහස වන්නේය.  

                                                         අනතුරක... 

                 වර්තමානයේ යොවුන්විය විශාල අනතුරකට මුහුණ දෙමින් සිටී.සෑම පසින්ම යොවුන්විය විනාශකිරීමට කුරුමානම් එල්ලවෙයි.යොවුන්විය යන්න ස්ත්‍රී පුරුෂ වශයෙන් දෙයාකාරයකි.මේ අතරින් වඩාත් අනතුරට මුහුනදෙන්නේ ස්ත්‍රී පාර්ශවයයි.ශක්තියෙන් ඇය පුරුෂයන්ට සාපේක්ෂව දුර්වලය.බොහෝදුරට මොනයම් ආකාරයේ ද්වීලිංගික සටනකදී වුවත් පුරුෂ පාර්ශවය තම අභිමතාර්ථයන් ජය ගන්නා ස්වරූපය වැඩිය.එයට පැහැරගැනීම්, දූෂණයට ලක්වීම්,ලිංගික බලපෑම් ආදී මෙකී නොකී ඕනෑම හිංසමයක් ඇතුලත් විය හැකිය.

           ජනමාධ්‍ය ඔස්සේ කිසියම් ප්‍රවෘත්ති විකාශනයක් වුවද මෙවන් තොරතුරක් හෝ කිහිපයක් විරල නොවේ.තත්වය උගත්,නූගත්,ගැමි,නාගරික කියා වෙනසක් නැත.මත්ද්‍රව්‍ය රට ගිලගෙන හමාරය.එම වෙළඳාම තරම් ඉක්මනින් කෝටිපතියන් වන වෙනත් මාර්ගයන් නොමැති තරම්ය.මෙය රැකියාව කරගත්තන් හට මේවායේ බෙදාහැරීම ද වැදගත් වෙයි.ඔවුන්ට අනුව මේවාට ඇබ්බැහි වූ පරපුරක් නිරන්තරයෙන් පැවතිය යුතුවෙයි.ඒ සඳහා පාසල් මුන්ගේ සිට යොවුන්විය දක්වා ඉතා කපටි යොමුකිරීමක් සිදු වේ.මේවා සිදුකරන්නන්ගේ ආරක්ෂාව දේශපාලඥයාගේ සිට පොලිස් කොස්තාපල්වරයා දක්වා දිවේ.ඔවුන්ද ඒවායෙන් ප්‍රතිලාභ ලබයි.මා දන්නා කාලයේ සිට දේශපාලඥයන්ගේ උදෘත පාඨය වූයේ “මතින් තොර ලොවක්“ගැනයි.නමුත් එය හුදෙක් වචනයන් පමණක්ය.

          මෙම ව්‍යසනයට මුල්ගල තැබෙන්නේ පාසල් දරුවන් අතින්ය.කලින් සඳහන් කල මත්ද්‍රව්‍ය ඊට නොමඳ සහයෝගයක් ලබා දෙයි.විකෘති මනස ඕනෑම දෙයකට පහසුවෙන් නම්මවා ගත හැකිය. ප්‍රවිශ්ඨය එසේ වුවත් අවසානය පාතාලයයි.මේ සඳහා බලපාන වෙනත් සාධක ද නැතුවාද නොවේ. දිළිඳුකම,නවාතැන,ආහාරපාන අභියස විශ්වවිද්‍යාල සිසුවෙකු වුවද මෙම තත්වයට පත්ව ඇති ඉඩකඩ වැඩිය.මේ කරුණු නැතත් ජන්මයෙන් උරුම වූ නැහැදිච්චකම,අකීකරුකම,නාහෙට නාහන ගුණයද බලපාන්නට හැකිය. 

          මේ සියල්ල වළකා, බුද්ධියේ පහන්වැට දල්වා ,අවිනිශ්චිත යුගයක ජීවත්වන අප යොවුන්විය පාලනය කරමින් ඇල්මෙන් අකුරුකර ඉදිරියට යාමට හැක.ඒ සඳහා දැඩි ශික්ෂණයත් කැපවීමත් අවශ්‍ය වෙයි.අප මුතුන් මිත්තන්ගෙන් අසා ඇති කියමනක් ඇත.“උත්සාහවන්තයා ජය ගනී“ යන්න එයයි.රටම ගිලගත් මෙම අඳුරට සාප කරනවා වෙනුවට එක් ඉටිපන්දමක් දල්වා ආදර්ශයක් ලබා දෙමු.... 

  

                                                          යථාර්තය මෙයයි....

            පවතින රජයේ ගුණදොස් පෙන්වාදීම හා විවේචනය කිරීම හා ඒවා ඔප්පු කර පෙන්වීම මාධ්‍යයක වගකීමයි.පවතිනා රජයට හා විපක්ෂයේ ක්‍රියාකලාපයන්ද මහ ජනතාව අතරට ගෙනයාමත් ඔවුන්ගේ යුතුකමයි.එහෙත් මෙම කටයුත්ත නියමාකාරයෙන් ඉටුවෙනවාද යන්න වෙනම ප්‍රශ්නයකි.විවිධ මාධ්‍ය විවිධ පක්ෂ හා පුද්ගලයන්ට ආවඩන අයුරු  මාධ්‍යයන්ට යොමුවන ඕනෑම කෙනෙකුට පහසුවෙන් හඳුනාගතහැක.මාධ්‍යකරුවන් පැහැරගෙන ගොස් සොයා ගැනීමට නොහැකි ලෙස ඔවුන් අතුරුදහන් කිරීම පසුගිය සමයේ සුලභ කරුණක් විය.ඔවුන් මේවාට ලස්සන නම් යොදාගැනීමක්ද සිදුකරයි.“ සුදු වෑන් සංස්කෘතිය“ ඉන් එකකි. ඈත අතීතයට ගියහොත් රිචඩ් ද සොයිසා හොද උදාහරණයකි.මෑත අතීතයට ගියහොත්,ලසන්ත වික්‍රමතුංග,ප්‍රදීප් එක්නැලිගොඩ පෙන්වා දිය හැකිය.මේවා අදටත් ආන්දෝලනාත්මකව පවතින කතාවන්ය.මේවා සම්බන්ධව සැකයට ගැනෙන අය රජයේ අනුග්‍රහය ඇතිව නිදැල්ලේම හැසිරෙති .නැතිනම් නීතියේ රැහැනෙන් පැන රටෙන් පැනයාම හෝ සැඟව සිටීම සිදුවේ.වරදකරුවන් හසුවූවත් ඔවුන් රක්ෂිත බන්ධනාගාර ගතකිරීම හෝ වෙනයම් දෙයක් කිරීම කළ නොහැක. රෝගී තත්වයක් හේතුවෙන් පුද්ගලික රෝහලකට ඇතුල් කිරීම හෝ සාමාන්‍ය වැරදිකරුවෙක් හෝ සැකකරුවකුගේ කටුක අත්දැකීම ඔවුන්ට නොලැබේ..

      සාධාරණය මෙයදැයි සිතා වදවීමෙහි ද, ක්‍රියාත්මක වීමෙහි ද වරදක් වන්නෙහිද?

තීරණය ඔබ සතු වන්නකි.දැනුවත්කරවීම මාගේ යුතුකමකි...

                                                                  කේන්දරය

කේන්දරය බොහෝ විට දකුණු ආසියාතික රටවලට සීමා වූවකි.එයිනුත් බොහෝ දේ අපට සංක්‍රමණය කර වූ ඉන්දියාව ප්‍රමුඛස්ථානය ගනී.

          සියළු ග්‍රහලෝක විවිධාකාර ලෙස සූර්යයා වටා කැරකෙමින් පථයක් නිර්මාණය කරගනී.පෘතුවිය ද තමා වටා කැරකෙමින් දිනයක් සම්පූර්ණකොට සූර්යයා වටා ද දින තුන්සිය හැට පහකදී කැරකෙමින් වටයක් සම්පූර්ණකර අවුරුද්දක් උදා කරනු ලබයි.අපට වැදගත් නොවූව ද අනෙක් ග්‍රහලෝක ද මේ ආකාරයෙන් භ්‍රමණය වෙයි.කෙනෙකු උපදින විට මෙම ග්‍රහයන් විශ්වයේ කිසියම් තැනක පිහිටා තිබෙන්නට ඇත.අපට උපදිනා දරුවන් පමණක් නොව තවත් බොහෝ දරුවන්ද මෙම වේලාවේදීම මෙලොව එළිය දකිනු ඇත.එම සංඛ්‍යාව ඉතා ඉහල අගයක් ගනී.උපදින වේලාව සහ,එදින ග්‍රහයන් අතර සම්බන්දයක් වෙතොත් එසේ උපදින සියළු දරුවන්ගේ සියළුම තත්වයන් සාධාරණ විය යුතුය.නමුත් එකම වෙලාවේ උපදින එකෙකු මහා වියතෙක් වන අතර තවකෙක් මංපහරන්නෙකු වන අවස්ථා කොපමණ ඇත්ද?එසේ වන්නේ ඇයිද යන්නට දෛවඥයන් තුළ පිළිතුරු ඇත.එහිදී අඟහරු උච්ච කරමින් සෙනසුරු නීච කරමින් සිකුරාගේ බලය හීනකරමින් අදාළ කේන්දරය අනුව කරුණු පෙලගස්වා ගනී. 

    කේන්දර බැලීම ද දෛවඥයන්ට පහසු කරවන කාරණා ඇත.බොහෝදුරට කේන්දර බලන්නේ කිනම් නපුරක් හෝ අකරතැබ්බයක් වූ විටය.දෛවඥයාට තීරණය කිරීමට ඇත්තේ 50%ක පැත්තක් පමණි.පැමිනි තැනැත්තාගේ ස්වභාවය බලා ඉතිරි කොටසින් හැගීමක් ගැනීමට හොඳ පලපුරුද්දක් ඔවුන්ට ඇත.තවත් කොටසක් පැමිණි තැනැත්තාගේ කතාබහෙන් වුකහා ගත හැකිය.මේ සියල්ල වැරදුන ද කියන්නට උත්තර තිබේ.“උපන් වේලාව වැරදියට සඳහන් වී ඇත“ මේවාට පිළියම් කරන්නටද වත්පිළිවෙත් ඔවුන් සතුය.ඉන් අනතුරුව එවන් අපල නීච වනු ඇත.මෙම පිළිවෙත් ඉටු කරන්නේද ඔවුන්මය.ඒවා බොහෝ සෙයින් මිල අධිකය.එහෙත් විවාහයකදී මෙය ඉතා හානිකර ලෙස බලපවත්වයි.සෙනසුරා හතේ අඟහරු හතේ යනාදී කරුණු ලබාදී ඔවුන් කේන්දර කොටුව තුළ හිරකර ගනී.මෙම කොටුවීම තුළද ගෙවල්වල නිකරුනේ වියපත් වන අය බොහෝය.කුමන තත්වයක් යටතේ හෝ කේන්දර සීමාඉර පැන්නවුන්ට අකමැති දෙමවුපියන් ඊට ඉඩ ලබා නොදේ.කෙසේ හෝ මෙම තීරන ගනන් නොගෙන දැඩි තීරණ ගන්නා පිරිසක්ද ඇත.ඔවුන් සමහරෙක් සාර්ථක වනු ඇත.සමහරෙක් අසාර්ථක වනු ඇත.කේන්දර සර්වප්‍රකාරයෙන් ගැලපුනු දෙදෙනෙකුගේ ද යථාර්තය එයයි.

මේ දෙගොල්ලන්ම තමන්ගේ පැවැත්ම මත ජීවත් වෙයි.නිසි ආකාරයෙන් සැලසුම් කර ජීවත්වන්නෝ බොහෝවිට සාර්ථක වනු ඇත.නිසි ආකාරව ජීවත් වූවද නොවූවද සාර්ථක වන පිරිස්ද ඇත.

එදා මහළු ගැලීලියෝ පෘතුවිය තමා වටා කැරකෙමින් සූර්යයා වටා ද කැරකෙන බව කී වරදට එවකට පැවති ධර්මාධිකරණය ඔහුගේ හිස ගසා මරා දැමීමට තීරනය කලවිට ඔහු කියා සිටියේ මගේ හිස ගසා දැමූවත්,පසුදිනත් පෘතුවිය සූර්යයා වටා කැරකෙනු ඇති බවයි.ඒ හඬින් මට ද කියන්නට ඇත්තේ කිසිම කලෙක කිසිවෙකුගේ ජන්ම පත්‍රය ඔවුන්ගේ ජීවිතය තීරණය නොකරන බවයි.