මත්පැනෙහි නියම අරුත...

                             

               මානව වර්ගයාගේ ඇරඹීම කොහිද මත් පැන්වල ඇරඹීමද ඒ තාක් කල් දුර විහිදෙනු ඇත.එදා පටන් අදවනතුරු මෙම අහිතකර ක්‍රියාව වැඩි වූවා මිස අඩුවීමක් සිදුවී නොමැත.මිනිසුන් විවිධ හේතු ඉදිරිපත් කරමින් මත් වතුරට ලඟාවෙයි.මේ තුළින් බිඳ වැටෙන පවුල් සංස්ථා ප්‍රමාණය අපමණය.බිඳ වැටීමක් සිදු නොවූවත් පවුල් ජීවිත අවුල් වියවුල් කිරීමට කෙතරම් දායකවන්නට ඇතිද? විශේෂයෙන්ම කය වෙහෙසා වැඩ කරන මිනිසුන් සිය ඇඟේපතේ අමාරුව සංසිදුවා ගැනීමට මත් වතුරේ පිහිට පතයිද? අතීතයේදී මෙම උත්තරයට සමාවක් දිය හැක.එහෙත් වර්තමානය මොනතරම් භායානකද? අනාගතය ගැන සිතා ගැනීමටවත්  නොහැක.පාසැලේ නිවාසාන්තර තරඟයේදීත්,මහා ක්‍රිකට් තරඟ වලදීත්,තොප්පි වලට මුදල් හිඟාකාගෙන මත්පැනට මුලකුරු කියන සිසුවා මහ මඟට වැටුනද, අතරමඟක වැටුනද,විශ්ව විශ්වවිද්‍යාලයට ගියද මෙම අත්දැකීම නැවත නැවතත් උරගා බලයි.ඉන් මතුව ඔවුන් බාලයින්ද මෙම කටයුත්තට යොදා ගනී.මගුල් ගෙදර,මළ ගෙදර,දානේ ගෙදර,විනෝද චාරිකා සියල්ලකටම මත් වතුරට පසුබිම් සංගීතය සපයයි.ඉන්පසුව උදාවන්නේ අවාසනාවන්ත ඇබ්බැහි වූවන්ගේ යුගයයි.

                            අප රටේ මත් කුඩු හා ඒවාට ඇබ්බැහි වූවන් පිළිබඳ බොහෝ වාරණයන් ඇත.කොටින්ම ස්වල්පයක් හෝ ළගතබා ගැනීම නීතියේ රැහැනට හසුවීමට හේතුවකි.මේවා නිසියාකාරව සිදුනොවීම වෙනම කතාවකි.එහෙත් නීතිය අවශ්‍ය ප්‍රතිපාදන සපයා තිබේ.එහෙත් මත් වතුර සඳහා එවන් මාර්ගයක් නොමැත.සෑම නගරයකම මත් වතුර සැල් රජයේ අනුග්‍රහය සහිතව පවත්වාගෙන යයි.ඊට අමතරව හොරව කෙරෙන ජාවාරම් කොපමණ ඇත්ද? මත් කුඩුවලට පැනවී ඇති නීති මධ්‍යසාරය සඳහා නොවේ.මහාචාර්ය නන්දසේන කෝදාගොඩට අනුව ඇබ්බැහි වීමේ ප්‍රතිශතය මධ්‍යසාරවල කුඩු වලට වඩා වැඩිය. මධ්‍යසාරයේ ආදීනව හොඳින්ම දන්නේ ඒවා පරිහරණය කරන පුද්ගලයනි.අධ්‍යාපනය මොන මට්ටමක තිබුණද,වෘතීය වශයෙන් කොතැන සිටියද,මෙයට වහල් වීම එකසමානය.ඉන් අඟවන තත්වයන් ගැන මෙවන් ලිපියකින් නොව මහා පොතක් ලියා වුවද අවසන් කල නොහැක.අනෙක් අතට මත් වතුරට වහල් වූවන් මෙහි ආදීනව හැමෝටම වඩා දනී.එහෙත් මෙම තත්වය හොඳින් තේරුම් ගෙන මුළුමනින්ම මධ්‍යසාරය ප්‍රතික්ෂේප කරන පිරිසක්ද අප රටේ ජීවත් වන බව අවසාන වශයෙන් ලියා තබන්නේ,එම ගොඩට එකතු වීමට ඇබ්බැහිවූවන්ටද උද්යෝගිමත් විය හැකි බව සානුකම්පාවෙන් මතක් කර දීමටය.